Wednesday, September 28, 2011

مقتطفات





الدنيا زي كتاب حساب


صفحاته متعادة

القسمة .... نصيب

والجمع .... لُقا

والطرح .... قدر

والضرب ... شقا

ومهما خاف اللُقا م الضرب

والقسمة بتحاذر م الطرح

الناس بتفضل شرق وغرب

محتاجه يوم تشبع م الفرح

والدنيا ولا على بالها عتاب

ونحبّها زيادة

ـــــ،،،ـــــــــ،،،،ــــــــ


بلياتشو ساب دمعه يخونه وسط الجمهور

الضحكة فارضه حدودها عليه أيام وشهور

وأمّا اعتذر للناس جرحوه وسابوا المسرح

ضحك ساعتها ومن قلبه ع الدنيا الزور

ــــــ ،، ـــــــــ ،، ـــــــــ


يا كلمة في سطر قاسم صفحتي بالعرض

انا م الصبر حيلي اتهد

وحلمي الحيله عينه من الكسوف في الارض

في آخر الصفحة شارع سد

ولون الحبر مش عادي

مسيري في يوم

ابص لنصها المليان واحس بنصها الفاضي

غريبة الغربة والاحزان

مابينهم خوف وبينهم عشرة وتراضي


ــــــــــــــــــــــ

احمد البوهي

Thursday, October 14, 2010

آخر قصيدة حزن




إنى تجاوزت الظنون وصرت أهون ما أظن

ولقد تملّكنى الأسى واغتالنى جرح الوطن

يا أيها الجلاد اقبِل وإتخذ

من ظهرى العريان ... قـِـبلَة سوطِك المكلوم

واضرب لا تضن

يا أيها الشيطان اقبل كى اميتك ألف مرة

كى لا اخون تمردى كى لا أحن

فالقلب عريانٌ كظهرى نادمٌ

وانا كذلك نادمٌ

متفرقٌ بين الكآبة والوهن

واصطفت الآمال في شغفٍ الى تحقيقها

فخذلتها

وتركت قلبي تائها

يبغي سبيلا بين أروقة الشجن

وانا مش هجيب اللوم على الخوف م الزمن

ولا يوم هحن

ولا هبكي على شىء م اللي راح

قلبي اللي ياما جرح قلوب

مات م الجراح

فمتندميش

انا اصلي مش هقدر اكونلك غير مافيش

جواكي شوق مابينتهيش

وانا بنتهي

بيتوه شراعي ومركبي

في بحر الحياه

ولا يوم وصلت لبرك الساكن بعيد

ولا يوم عرفت البحر فين آخره ومداه

انا زي موجك يا هوى

بيروح لحد الشط مفرود الجناح

وبينتحر حُر  برضاه

وانا مركبي لسّاها بتناطح هواه

كل المراكب من ورق يا بحر بتسافر بعيد

وانا زيها بعافر عنيد

بتحب فيك طعم الغرق

وتحب فيك طعم الحياه

فمتسأليش عن غيابي

وحالي في غيابك

ووفري عتابك

أنا كنت كدابك

وفضلت كدابك

أسرني فيكي الحنين

ومشيت ورا عتابك

ودخلت من بابك

وخرجت من غير قلب

حبك ذنوب .. مش ذنب

وانا ما احتملش عذاب

حبك امل كداب

بتذكر الحزن فيكي

وف صمت تنهيدك

انا خانّي تفكيري

وتعبني تفكيرك

وعشان أعوض

لقلبي حبك المهزوم

حبيت كتير غيرك

ولسه من غيرك

ماعرف طريق للرجوع

لو عارفة معنى السفر

اجمل ما فيه الدموع

..

..

الغربة ما سابيتنيش

وحلفت ما هسيبها

آخر قصيدة وجع يا حزن هكتبها

والوزن لو مكسور خدها .. على عيوبها

فصلّتلي توبها

وماسيبتليش اختيار

خمس سنين والقصايد

بتعيد في نفس المعاني

وبتعزف اللحن شارد

وتنوح على الاوتار

وبتعشق الاشجان

وتمجّد الاحزان

والحزن اصله جبان

الحزن ما بيبكيش

الحزن بيبكــّـي

والغربة مبتشكيش

الغربة بتشكـّـي

فمتسئليش عني

وتشُكّي وتظنّي

انا مش هخاف منك

انا بخاف مني

انا لست دون الهوى لكنني نَــدِمٌ

فالعشق فيكي تفرقٌ

والهجر فيكي كما اشتياق

سأقاوم هجركِ رغما عنّي ولن اشتاق

واقاوم هجر البسمة من وجهي

خشية املاق

سأقاوم كل صنوف الهجر وأي فراق

سأعود إلى نفسي يوما

وأعانق فيها الحلم واهرب

من صمت الاوراق


ـ أحمد البوهي

Monday, April 19, 2010

يمكـــــــــــــــــــــــــن






مبقتش فاكر
غير يادوب البسمة في عيونِك

والحلم بيسافر لحد الموت
ولا يرجعش

مبقتش فاكر ليه عيوني من الألم
ساكته مابتدمعش

يمكن يكون قلبنا بقى زيه زي الصخر

من امتى كان الموج بيخاف يعيش في البحر؟

من امتى كان الحب بيآمن بفعل السحر ؟

انا كنت مركب ورق مايشلش غير قلبين

تايه في بحر الحنين والموج بيحدفني

مبقتش حاسس بغربه وده اللي خوّفني

تفتكري يوم الرجوع هتردلي روحي ؟

ولَا في يوم الرجوع هتزوّدي جروحي ؟

؟
؟

خايف أخاف منك

وافضل احبك بضعف ومن بعيد لبعيد

من امتى خانّا الحنين
وصبح في صبره عنيد ؟

من امتى عشق الذكريات
بيعوّض القلب الحزين
عن نبض بيخليه سعيد ؟؟

من امتى سيبنا الوقت يسرقنا؟

وضعف الحلم فرّقنا

وطيفنا بيبتدي يسكن ملامح خوفنا م الاحلام

من امتى انا وانتي ابتدينا نخاصم الايام ؟

يمكن بقالنا زمان
والوقت فاق الحد

يمكن ما بينّا
لكن كلام ع الأد

يمكن ويمكن أوى...... مبقتش فاكر بجد






احمد البوهي

Thursday, December 17, 2009

بعاد






بنتحجج بأى كلام يعيد لحظة لـُقا تاهت

ونتفاجيء بإن كلامنا من طول البعاد باهت

ويفضل في الحنين كلمة ولا بتسكت ولا اتقالت

.
.
.


ويبدأنا الكلام بسؤال

عن الاخبار وأحوالنا

حروف اجابتنا بالمللى بنفس اللفظ والمعنى

تمام الحمد لله ع الحياه ـ عايشين

ويرسم صمت ملامحنا عتاب وحنين

نعود للذكرى ونسلّم ـ ونتألم

يكون الصمت على آخره . . فنتكلم

ونتفاجىء

بأن كلامنا من طول البعاد باهت

وان الحلم في لقانا ضمير ساكت

ونتسابق يامين يوصل

حدود الذكرى قبل التانى يحكيها

وتسكن فينا اوجاعها وتسرح فينا حكاويها

ونتنهد ويرجع صبرنا للصمت

وينهينا الكلام بوداع بنفس اللفظ والمعنى

ونفس الكبت

ـ قوام الوقت بيعدي ـ ترد تقول سرقنا الوقت

ونتفرق على وعد اللقا تانى

نعيد لحظة لقا تاهت
*****
احمد البوهي



Thursday, September 24, 2009

احاسيس متناثرة




مبقتش أصدق نفسى رغم الكدب مش عادتى
ورغم الحيرة والتكشيرة
والبسمة اللى بيعاند حدودها الخوف
بصادف طول حياتى ظروف
تتوه ملامحها ا فى ارادتى

*
*
*


عندما تجد نفسك اسيرا لذكريات أفنيت عمرك فى صياغة أحداثها ولا تجد حولك من نصّبتهم أبطالا لتلك الذكريات فلا تلومن أحدا أبدا .. فتلك طبيعة الحياه .

كثيرا ما يمر بك احساس يأخذك الى عالم لا تعرفه .. شعور لا تجد له وصفا فى مخيلتك غير أنك تفتقد أشياء وأشخاص يمثلون لك الكثير .. تريد أن تحكى عما يجول داخلك تترصد الكلمات فى اعماقك ولا تجد حرفا واحدا يعبر عم ا انت فيه .. تبحث بين أصدقاءك عمن يعيرك سمعه ومشاعره وان وجدته فتجد نفسك تتحدث فى كل شىء سوى مايشغلك .
يأخذك الخيال الى حالة من الشرود تفصلك عن العالم .. وتجهما يرسم ملامحه على وجهك .. تستطيع ساعتها أن تحدث نفسك فى موضوعات لاتنتهى وتأخذك الذاكرة فى رحلتها وبين رحاياها .

تستطيع ان تكشف عن فلسفة الحب داخلك بكونه شعور دائم بالافتقاد لأحاسيس تتسم دوما بالرقي والرغبة فى الارتقاء .. تستطيع ان ترسم ملامحك بشكل تفصيلى يجعل مرآتك تستعيره منك ولكنها لا تحتفظ به .. تشرد أكثر ويأخذ الماضى الى أماكن تركت فيك اثرا وأحداث لا تتكرر مع الوقت .. تقف لحظات وتتمنى أن يعود بك الزمن الى الوراء..ولكن لا محالة .

احيانا تثيرك الفكرة أن تضغط على زر مسجل صوتى وتتحدث الى أن يملَّك الكلام او تمله ، تنتهي حيرتك الى الكتابة فهى ملاذك الاخير فى التعبير عن احساسك .. لتجد ما تكتبه لا يختلف كثيرا عن الصمت فى ابهامه .. وتبقى وحدك على يقين أن الحروف لم تعد باستطاعتها ان تصف احساسك كما هو بدون ابهام او تناثر .. فتقف عاجزا امام سؤال الآخرين .. ماذا بك ؟ فلم تجد ردا مقنعا لك حتى تجيب به.. لتكتشف عجز حروفك عن التعبير.


*

*
*

فى قلوبنا آلام .. وعتاب وملام
وسكوت بيفوت يرسم احلام
والضحكة بتعند فى دموعنا
وتاه موضوعنا
وندوّر على مين يسمعنا
ولو اتلقيناه .. ما نلاقى كلام


ــــ


احمد البوهى